Skilmálar andmæla

Andmæli eru rökstudd samantekt til endurskoðunar á álagningu stöðvunarbrotagjalds. Mikilvægt er að með ósk um endurupptöku ákvörðunar fylgi þau gögn sem aðili máls hefur undir höndum sem geta styrkt málstað hans, s.s. afrit af keyptum tímamiða eða kvittun vegna dráttarbifreiðar.

Með því að senda inn andmæli samþykkir andmælandi neðangreinda skilmála.

1.gr.

Heimilt er að óska eftir endurskoðun ákvörðunar um álagningu stöðvunarbrotagjalds innan 28 daga frá dagsetningu álagningar. Almennur afgreiðslutími er 2-4 vikur.

2.gr.

Sé andmælandi eigandi/umráðamaður ökutækis skal gefa upp símanúmer og tölvupóstfang.  Þegar andmælandi er annar en skráður eigandi/umráðamaður bifreiðar skal gefa upp nafn, kennitölu, heimilisfang, símanúmer og tölvupóstfang andmælanda.

3.gr.

Andmælandi skal gera grein fyrir máli sínu á skýran hátt og koma á framfæri þeim upplýsingum er nauðsynlegar eru til úrvinnslu málsins. Andmælandi skal jafnframt skila inn þeim gögnum til stuðnings máli sínu, sem eðli gagnanna samkvæmt eru ekki aðgengileg Bílastæðasjóð. Ekki þarf að skila inn afriti af brotalýsingu. Hægt er að skila inn gögnum vegna málsins með beiðni um endurupptöku, á netfangið [email protected] eða með almennum pósti innan 7 daga. Eftir það fer málið í vinnsluferli.

4.gr.

Andmælandi gefur Bílastæðasjóð heimild til að afla upplýsinga til staðfestingar á þeim upplýsingum sem koma fram í andmælum. Upplýsingar geta m.a. verið sóttar í þjóðskrá, ökutækjaskrá eða frá öðrum aðilum allt eftir eðli máls hverju sinni.

5.gr.

Andmælandi gefur Bílastæðasjóð heimild til að afla upplýsinga hjá sýslumönnum vegna útgáfu og gildistíma stæðiskorta fyrir hreyfihamlaða.

6.gr.

Andmælandi gefur Bílastæðasjóð heimild til að leita eftir umsögn þess sem lagði gjald á ökutækið og jafnframt heimild til að skoða ljósmyndir af vettvangi.

7.gr.

Þegar andmælt er gjöldum sem lögreglan hefur skrifað á bifreið gefur andmælandi Bílastæðasjóð heimild til að áframsenda málið til lögreglu.

8.gr.

Þegar andmæli hafa borist tekur álagningin áfram lögbundnum hækkunum skv. umferðarlögum á meðan þau eru í vinnslu. Við afgreiðslu máls fellur gjaldið niður sé erindið samþykkt en sé erindinu hafnað fer gjaldið aftur í þá upphæð sem það stóð í þegar andmæli bárust að því undanskildu að staðgreiðsluafsláttur er einungis veittur ef greitt er innan þriggja virkra daga frá álagningu gjaldsins. Aðilum er bent á að þeir eiga þess kost að greiða gjaldið þrátt fyrir andmæli og fá það endurgreitt ef fallist er á beiðni þeirra um niðurfellingu gjaldsins.

9.gr.

Úrvinnsla andmæla á sér stað hjá Bílastæðasjóð. Skv. 4. mgr. 109. gr. umferðarlaga nr. 77/2019 verður ákvörðun um álagningu gjalds ekki borin undir æðra stjórnvald. Heimilt er að bera ákvörðun Bílastæðasjóðs undir Héraðsdóm Reykjaness.